منتدى لي ولحبيبتي Emy

منتدى لنشر صوري والاغاني والالحان الخاصه بي


    رساله الى حبيبتي أيمي

    شاطر

    Admin
    Admin

    عدد المساهمات : 38
    تاريخ التسجيل : 16/07/2014
    العمر : 21
    الموقع : بغداد

    رساله الى حبيبتي أيمي

    مُساهمة من طرف Admin في الأربعاء يونيو 03, 2015 11:40 pm

    السلام عليكم هديار ...
    حبيبتي دائماً ارد اكلج بشي بس اكول انه الوقت الغير مناسب وكل الي اعرفهم واحجيلهم قصة حبنا يكلي انته لازم تكللها هذا الشي وخاصه عبدالرحمن دائماً يسئلني يكلي كتلها لو لا ولمن اكله لا يضوج يكلي كللها حتى تعرف اشديصير ....

    حبيبتي الموضوع هو انه انتي املاحضه انه المشاكل دتصير ودتكثر ودزيد يوم بعد يوم وصرنا نضوج او بالاحرى صرتي اضوجين من كلشي اسوي واتكليلي غلط مع انه ياهو الي اكله هذا صح لو غلط يكلي هذي حريتك ومالها حق تدخل اذا اتغار عليك فهذا من حبها لكن ميصير تمنعك من كلشي ....هذي مو غيره هذا دمار ...

    حبيبتي اذكري اول ما بدينه واحد يحب الثاني جنه منعرف شنو مشكله ولا جانت اكو مشاكل بينه وجنتي مجنونه بيه اكثر من هسه
    وجنتي تثقين بيه وتخافين عليه وتحترميني واتخافين انه ازعل او ما احجي وياج .....
    اما هسه ما ادري انتي حاسه على روحج لو لا ما ادري .... اذكري من كتلج بلشقه راح اعوفج اذكري اشسويتي ابوكتها مو رحتي شكيتي ايديج وبجيتي .... واذكري من كتيلي كذاب واني ظجت وما حجيت شي كمتي تبجين واتكليلي اني اسفه وسديتي الفون ودزيتيلي رساله كاتبه بيهه اني بسفه وبعد ما اعرف شلون احجي وياك ..... وتذكرين من بديتي اتحبيني جنتي لا تجاوزين ولا جنتي اتأذيني بكلمه ولا اضوجيني وجنتي ادلليني دلال مشايفه من امي ... وهذا سبب جنوني بيج ...جنتي اذا اغظب اتسوين المستحيل علمود اهدئ واتهدئيني بكلام مسامعه من احد قبلج .... وحتى مرات مجنت اعرف شلون اردلج وجنتي اذا سديتي الفون بوجهي تخابرين وتعتذرين وتبقين تعتذرين حتى تسمعين مني كلمة سامحتج ..وجنتي اتنفذين الي اريده بلحرف الواحد واذا اكلج هذا الشي ميعجبني لو جان اغلى ما عندج لو حانت روحج جنتي مستعده تتخلين عنها من اجلي.. وجنتي ابد ما اتخليني اخابر اني جنتي اتكليلي ما اسمحلك انته اتخابر اني اخابرك ...ومجان يمضي يوم اذا انتي ممخابره او مسامعه صوتي واتكليلي ميكمل يومي من دون ما اسمع صوتك واتكلي احبج .... اذكري هديار ... اذكري ....
    و وره متذكرين شوفي حبج اليه او نكدر انكول طريقة حبج اليه شلون صارت ....
    اصيحين واتعاتبين واتعلين صوتج ومسمعين كلامي وكلما اضوجين اتسدين الفون بوجهي واتكليلي امشي ولي وهاذي كلمه مجنت اسمعه منج ابد !!! واضمين عليه وصرتي مستعده تتخلين عني باي لحضه وباي وقت ونسياني صار سهل عندج ... وصار عادي انه تمر ايام اذا ماعندي رصيد لا تخابرين ولا اتسئلين ولا تسمعين صوتي ...وصرتي تجاوزين ...ومتهتميلي مثل قبل ....
    جنتي غامرتني بحناني بحيث جنت مستعد اتخلى عن حضن ودفئ وحنان امي علمودج لان حنانج عليه جان فدشي محاس بي ولا احد محسسني بهذا الحنان .... جنت احس نفسي مالك العالم لمن اني وياج نمشي او نتخابر او نسولف ....
    جنتي الام والاب والاخت والاخ والصديقه والصديق والقريب والبعيد والحاضر والماضي ...جنت كلشي بحياتي ....جنتي تصرفين تصرفات نسيتي شلون تصرفيها بمرور الايام .... اسلوبج اتغير ويايه بشكل انتي محاسه بي ولا راح اتحسين بي ....لكن المقابيل راح ايحس بي ويلاحظ هذا الشي بكل سهوله ....
    يا عمري انتي اتغيرتي كوووومه وكمتي اتسوين اشياء غلط لكنها بفكرج انها الصح .... ومجنت اكدر اكول انو انتي على غلط حتى لا اتملين مني وهذا صحيح لان من كمت اكلج انتي على غلط اتزعلين واتكليلي انته ممل ولئيم ....
    ما ادري احس نفسي طولت بلموضوع لكن هذا الي جان لازم اكلجياه من زمان ....
    اسئلي اي بنيه او اي حبيبه شلون تصرف ويه حبيبها وشوفي اكو واحد يحبج بكدي او مستحمل تصرفاتج بكدي ... روحي واسئلي البنات كليلهم علموني اشلون اتصرف ويه حبيبي روحي واسئلي دلال كلها علميني واذا تخجلين فاكو مواضيع كومه بلنت عن كيفيه تعامل الفتات مع حبيبها فوتي واقري .... بس ميحتاج لان انتي اتعرفين كلشي وكل الي راح يكولو الج او راح تقري جنتي تصرفي ويايه ابداية حبنا لكن نسيتي وكمتي تصرفين غير تصرفات ...
    ما ادري الكلام طويل وكومه اكو بداخلي حجي لكن هذي البدايه فقط والنهايه بعدها مجايه .... جنتي غير هديار الي اعرفها بلجامعه وجنتي غير هديار الي احجي وياهه هسه ... جنتي بنيه مشايف مثلها بعمري ... واتمنه ترجعلي (( هديار )) الي عرفتها ابداية حبنا لكن دا افتقدها بس مدا اكدر اكلج بهذا الشي او بهذا الشعور ...

    على العموم مهما كنت ومهما راح تكونين فراح تبقين حبيبتي وحياتي وعمري وروحي وقلبي وهدهودة قلبي واغلى ما عندي واحلى شي ودنيايه وليلي وصباحي وراح تبقين انتي قطرة الدم الي تنبض بداخل قلبي وراح تبقين انتي الهوه الي اتنفس وراح تبقين نور عيوني الي  اشوف بيهه وراح تبقين الكلمات الي انطق بيهه وراح يبقى اسمج محفور على قلبي بلدم و راح تبقين ملاكي وحبيبتي وزوجتي .... وحبي الاول والاخير  
    وراح ابقه اكلج ......... هديار احبج .........
    واعشقج
    واموت عليج
    ومجنون بيج
    ......

      الوقت/التاريخ الآن هو الأربعاء فبراير 22, 2017 12:29 am